ރޯދަމަހު ސަލަފުން ނިކަމެތި އާއިލާތަކަށް ކާބޯތަކެތި ފޯރުކޮށްދީ، އެހީތެރިވަނީ

އަމިއްލަ ޒަރޫރީ ބޭނުންތައް ފުއްދުމުގައި ދަތިކަަން ތަހައްމަލު ކުރަމުންދާ އާއިލާތަކަށް އެހީތެރިކަން ފޯރުކޮށްދީ، މި ރޯދަމަހު ވެސް ސަލަފު ޖަމިއްޔާ އިން އިތުރު ހަރަކާތްތަކެއް ހިންގަން ފަށައިފި އެވެ.

އެ ޖަމިއްޔާ އިން ދަނީ ކޮންމެ ރޯދަމަހަކު ވެސް ނިކަމެތި އާއިލާތައް ރޯދަމަހަށް ބޭނުންވާ އަސާސީ ކާބޯތަކެތި ފޯރުކޮށްދިނުމަށް "ވާބިލު" ނަމުގައި ޕްރޮގްރާމެއް ހިންގަމުންނެވެ.

ސަލަފުން މިއަދު ބުނީ އެ ޕްރޮގްރާމުގެ ދަށުން ކޮންމެ އާއިލާއަކަށް ވެސް ވައުޗާ ދޫކުރާނެ ކަމަށެވެ. އެ ވައުޗާ ބޭނުންކޮށްގެ ރެޑްވޭވުގެ ތިން ފިހާރައަކުން ގެއަށް ބޭނުންވާ ތަކެތި ގަނެވޭ ގޮތަށް އެ ޖަމިއްޔާ އިން ވަނީ ހަމަޖައްސައިފަ އެެވެ.

މި އަހަރު ވެސް އެ ޕޮރޮގްރާމުގެ ދަށުން މިހާތަނަށް 61 އާއިލާއަކަށް ވައުޗާ ދޫކޮށްފައިވާ ކަމަށް ސަލަފުން ބުންޏެވެ.

ހޮސްޕިޓަލްތަކުގައި ޑިއުޓީގައި ތިބޭ ނަރުހުންނާއި ޑޮކްޓަރުން އަދި ބަލިމީހުންގެ އެހީތެރިންނަށް ރޯދަވީލުމަށް ހަދިޔާ ޕެކް ދިނުމުގެ މަސައްކަތް ވެސް އެ ޖަމިއްޔާއިން އަންނަނީ ކުރަމުންނެވެ. އެ ޕެކް ބެހަނީ އައިޖީއެމްއެޗާއި ހުޅުމާލެ ހޮސްޕިޓަލަށެވެ.

މި ރޯދަމަހުގެ ފުރަތަމަ 10 ދުވަހު އައިޖީއެމްއެޗަށް 3،650 ހަދިޔާ ޕެކާއި ހުޅުމާލެ ހޮސްޕޮޓަލަށް 2،100 ހަދިޔާ ޕެކް ބަހާފައި ވާއިރު މި އަހަރު އަލަށް ރ. އުނގޫފާރު ރީޖަނަލް ހޮސްޕިޓަލުގައި ވެސް ބަހަން ފަށާފައިވާ ކަމަށް ސަލަފުން ބުންޏެވެ.

ސަލަފުން އަންނަނީ ކޮންމެ ރޯދަމަހަކު ބައެއް މިސްކިތްތަކުގައި ރޯދަވީއްލުން ވެސް ދެމުންނެވެ. އެގޮތުން ހުޅުމާލެ 2ގެ މަސްޖިދު އަބޫބަކުރު އައްސިއްދީގާއި މާލޭގެ އިސްލާމީ މަރުކަޒުގައި ރޯދަވީއްލުމަށް ސުފުރާއަޅަ އެވެ. އެވުރެޖުކޮށް ހުޅުމާލެ މިސްކިތުގައި ދުވާލަކަށް 50 އަށް ވުރެ ގިނަ މީީހުންނަށް ރޯދަވީލުމުގެ ހިދުމަތް ފޯރުކޮށްދޭއިރު، އިސްލާމީ މަރުކަޒުގައި ދުވާލަކު 400 މީހުންނަށް ރޯދަވީލުންދެ އެވެ.

ދަރުސް ދިނުމަކީ ވެސް އެ ޖަމިއްޔާއިން ކުރަމުން އަންނަ މަސައްކަތެކެވެ. ސަލަފުން މި އަހަރު ދަރުސްދޭ މިސްކިތްތަކާއި އެ ޖަމިއްޔާގެ ހަފްތާ ބަންދު ދަރުސްތައް، ފުރަތަމަ 10 ދުވަސް ނިމުނުއިރު 17 ރަށެއްގައި ވަނީ ކުރިއަށް ގެންގޮސްފަ އެވެ.

ރޯދަމަހުގެ ފުރަތަމަ 10 ނިމުނު އިރު ހަފްތާ ބަންދުގައި ސަލަފުން ވަނީ 17 ރަށެއްގައި ހޭލުންތެރިކަމުގެ ޕުރޮގްރާމު ބާއްވައިފަ އެވެ. އެއީ ހއ. ހޯރަފުށި، ހއ. އުތީމު، ހއ. ވަށަވަރު، ހދ. ނޭކުރެންދޫ، ޅ. ހިންނަވަރު، ކ. ގުރައިދޫ، އއ. ތޮއްޑޫ، އދ. މާމިގިލި މ. މުލި، މ. މަޑުއްވަރި، މ. ވޭވަށް، މ. ދިއްގަރު، ދ. ކުޑަހުވަދޫ، ގއ. ވިލިނގިލި އަދި ގއ. ދެއްވަދޫ އެވެ.  

ސަލަފު ޖަމިއްޔާ އިން އަންނަނީ ރާއްޖޭގައި މަސައްކަތް ކުރާ ބަނގުލަދޭޝް މީހުންނަށް ހާއްސަކޮށް ކޮށްގެން، އެ ގައުމުގެ ބަހުން އަދި ބަންގްލަދޭޝްގެ އިލްމުވެރިއެއް ރާއްޖެ ގެނެސް ކޮންމެ ދުވަހަކު އަސްރު ނަމާދު ފަހު، ވިޔަފާރިވެރިންގެ މިސްކިތާއި ސަލްމާން މިސްކިތު ގޯތިތެރޭގައި ދަރުހެއް ވެސް ބާއްވަމުންނެވެ.

ފޭސްބުކް މެދުވެރިކޮށް އިނާމު ލިބޭ ގޮތަށް ސަލަފުން ވަނީ ރޯދަ ސުވާލު މުބާރާތެއް ވެސް ކުރިއަށް ގެންގޮސްފަ އެވެ. 

އެ ޖަމިއްޔާއިން ވަނީ ރޯދަމަހަށް މަރުހަބާ ކިޔުމުގެ ގޮތުން ހަދިޔާ ދިނުމުގެ ބޮޑު އިވެންޓެއް ވެސް ބާއްވައިފަ އެވެ. ކޮންމެ އަހަރަކު ވެސް 101 އިނާމު ހިމެނޭ މި އިވެންޓުގައި އަގުހުރި ތަފާތު އިނާމުތައް އިވެންޓަށް ގޮސްގެންނާއި އޮންލައިންކޮށް ވެސް ބައިވެރިވެވޭ ގޮތަށް ގެންދާއިރު، މި އަހަރު ރޯދަ ހަދިޔާ އިވެންޓު ބާއްވާފައިވަނީ މިދިޔަ މަހުގެ 13 ވަނަ ދުވަހު ސެންޓްރަލް ޕާކުގަ އެވެ.

އެ އިވެންޓުގެ އެއްވަނަ ހަދިޔާއަކަށް ދީފައި ވަނީ ހައްޖު ދަތުރެކެވެ. އޭގެ އިތުރުން ސައިކަލަކާއި އުމުރާ ދަތުރަކާއި އަދިވެސް އަގުހުރި ބޮޑު ނުވަ ހަދިޔާ ދިނެވެ. އަދި އޮންލައިނުކޮށް ބައިވެރިވި 15،000 މީހުންނަށް ވެސް ބައިވެރި ވެވޭގޮތަށް 90 ހަދިޔާ ބެހި އެވެ.

ސަލަފުން ބުނީ ރޯދަމަހު ކުރިއަށް ގެންދާ ހަރަކާތްތަކުގައި ބައިވެރިވުމުގެ ފުރުސަތު އަދި ވެސް އެބައޮތް ކަމަށެވެ.