އައްޑު އާއި ކެންޔާ އަދި އިންޑޮނޭޝިޔާއާ ދެމެދު އިކޮނިމިކް ޓްރޭޑް ރޫޓެއް ގާއިމް ކުރުމުގެ ހިޔާލު ކުރިއަށް ނެރުއްވައި، އެކަން ހާސިލް ކުރަން ކުރީގެ ރައީސް މުހައްމަދު ނަޝީދު މަސައްކަތްޕުޅު ފައްޓަވައިފި އެވެ.
އެކްސްގައި ނަޝީދު ރޭ ޕޯސްޓް ކުރެއްވި ވީޑިއޯއެއްގައި ވިދާޅުވީ އައްޑު އަތޮޅުގެ އެންމެ ބޮޑު ނިއުމަތަކީ އެ އަތޮޅު އުފެދިފައި އޮތް ތަން ކަމަށާއި އެއީ އިންޑިއާ ކަނޑުގެ ސީދާ މެދު ކަމަށެވެ. އެއްކޮޅުގައި އެފްރިކާ އަދި އަނެއްކޮޅުގައި މެލޭޝިއާ، އިންޑޮނޭޝިއާ، ސިންގަޕޫރު ފަދަ ގައުމުތައް ކަން ނަޝީދު ފާހަގަކުރެއްވި އެވެ.
އިންޑިއާ ކަނޑަކީ ދުނިޔޭގެ އެކި ކަންކޮޅުތަކުން އެތައް ބޯޓު ފަހަރެއް މުދާ އުފުލަން ބޭނުން ކުރާ ރޫޓެއް ކަމަށާއި އޭގެ ފައިދާ އައްޑު އަށް ނެގޭނެ ކަން ނަޝީދު ފާހަގަކުރެއްވި އެވެ. އެގޮތުން އެ މަނިކުފާނު ހިޔާލަކީ އައްޑޫގައި ގްރީން އިކޮނޮމިކް ކޮރިޑޯއެއް ގާއިމް ކުރުން ކަން ހާމަކުރެއްވި އެވެ.
"މި ކޮރިޑޯ ފަށަން އެންމެ ރަނގަޅު ތަނެއް ކަމަށް އަޅުގަނޑަށް ފެންނަނީ ކެންޔާގެ މުމްބާސާ، ދެން އައިސް އައްޑޫ، ގޮސް ނިންމަން އިންޑޮނޭޝިއާގެ ޖަކާޓާ. ތިޔަ ބޭފުޅުން އިންޑިއާ ކަނޑުގެ ޗާޓު ބައްލައްވާލެއްވީމަ އަޅުގަނޑު މި ދަންނަވާ ވާހަކަ ބޮޑަށް ސާފު ވާނެ،" ނަޝީދު ވިދާޅުވި އެވެ.
އެކަން ކުރަން އެންމެ ރަނގަޅީ ނަޝީދު ވިދާޅުވި ގޮތުގައި އައްޑުއަކީ ޓްރާންޝިޕްމަންޓް ބަނދަރަކަށް ހެދުމަށް ފަހު އެވެ. ނަޝީދު ވިދާޅުވާ ގޮތުން މި ރޫޓު މަސައްކަތް ކުރާނީ މުމްބާސާގެ ބަނދަރުން ކުދި ބޯޓު ފަހަރުގައި ކޮންޓެއިނަރުތައް ގެނެސް، އައްޑޫގައި މުދާ ބަހައްޓާ ގޮތަށެވެ. އަދި ޖަކާޓާއިން ވެސް ބޯޓު ފަހަރުގައި މުދާ ގެނެސް އައްޑޫގައި ބަހައްޓާފައި އެނބުރި ދާ ގޮތަށެވެ.
އެނބުރި ދާ ބޯޓުތަކުން ދާނީ އަނެއް ކޮޅުން ގެނެސް އައްޑޫގައި ބަހައްޓާފައިވާ މުދާތައް ހިފައިގެން ކަމަށް ނަޝީދު ވިދާޅުވި އެވެ.
"ގްރީން ކޮރިޑޯއެއްގެ ގޮތަށް އަޅުގަނޑު މި ދަންނަވަނީ ހުރިހާ ކަމެއް ވެސް އިޔާދަކުރުވަނިވި ހަކަތައިން ހަމަޖެހިގެން ދިޔުން އަދި އެހެން ކަންކަން ވެސް ތިމާވެއްޓަށް ބެލުމަށް ފަހު ނޫނީ ނުކުރުން. އަދި މިއީ ގްރީން އިކޮނޮމިކް ކޮރިޑޯއެއްގެ ގޮތުގައި އަައްޑޫން މި މަސައްކަތް އިއުލާންކޮށް ފަތުރާ ހެދުން،" ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި، ދާދި ފަހުން ކެންޔާގެ ރައީސް ވިލިއަމް ރޫޓޯއާ ބައްދަލުވި ކަމަށާއި އެ މަނިކުފާނުގެ ހިޔާލު ވާނީ ރައީސް ރޫޓޯއާ ވެސް ހިއްސާ ކުރައްވާފައި ކަމަށެވެ. ރައީސް ރޫޓޯ ވަނީ އެކަމަށް ޝައުގުވެރިކަން ފާޅުކުރައްވައި، އެކަމުގައި ފިސިބިލިޓީ ހެދުމަށް ކުރަން ޖެހޭ ކަންކަމާ އުޅުމަށް އެ މަނިކުފާނުގެ މިނިސްޓަރުންނަށް ދަންނަވާފައި ކަމަށް ނަޝީދު ވިދާޅުވި އެވެ.
"ދެން އަޅުގަނޑު މި ޖެހޭނީ ރާއްޖޭގެ ބޭފުޅުންނާ އަދި ޖަކާޓާއިންނާއި މިކަމުގައި އެއްބާރުލުން ހޯދަން،" ނަޝީދު ވިދާޅުވި އެވެ.