ރާއްޖޭގައި އާބާދީ އެންމެ ކުޑަ އެއް ރަށް ކަމަށްވާ ވ. ރަކީދޫ ކައުންސިލްގެ ދެ މެމްބަރަކު ފިޔަވައި ހުރިހާ މެމްބަރުންނާއި އެތަނުގެ އިދާރީ މުވައްޒަފުން އިސްތިއުފާ ދިނުމުން އެތަނުގެ މަސައްކަތް ހުއްޓިފައި ވާތީ ރައްޔިތުންގެ ތެރެއިން ބަޔަކު ނުކުމެ އެތަން ބަންދުކޮށްފި އެވެ.
ވ. އަތޮޅު ކައުންސިލުގެ ރައީސް ޝުޖާއު އަލީ އެކްސްގައި މިއަދު ވިދާޅުވި ގޮތުގައި އިދާރީ މުވައްޒަފުންނާއި ކައުންސިލަރުންގެ ތެރެއިން ތިން މެމްބަރަކު މަގާމުން ވަކިވެފައި ވާތީ، ކައުންސިލް އިދާރާއިން ރައްޔިތުންނަށް ދޭންޖެހޭ އެއްވެސް ހިދުމަތެއް ނުދެވޭ ކަމަށެވެ. އެހެންވެ ރަށުގެ ބަޔަކު ނިކުމެ ކައުންސިލު އިދާރާ ބަންދުކުރީ ކަމަށް އޭނާ ވިދާޅުވި އެވެ.
ޝުޖާއިގެ އެ ޕޯސްޓާ އެކު އާންމުކުރެއްވި ފޮޓޯތަކުގައި ފެންނަނީ ކައުންސިލް ދޮރު ފިލާޖަހައި ބަންދުކޮށް، ދޮރު މަތީގައި ޑެސްކްތަކެއް އަތުރާފައި ހުއްޓަ އެވެ.
މިކަމާ ގުޅިގެން ލޯކަލް ގަވަމަންޓް މިނިސްޓަރު އާދަމް ޝަރީފް އުމަރު އެކްސްގައި ކުރެއްވި ޕޯސްޓެއްގައި ވިދާޅުވީ އާބާދީ މަދު ރަށްތަކުގައި އިދާރީ މުވައްޒަފުންގެ ދަތިކަން ކުރިމަތިވާ ކަމަށާއި އެ މައްސަލަ ހައްލުކުރުމަށް މަސައްކަތް ކުރަމުން އަންނަ ކަމަށެވެ.
އާދަމް ޝަރީފް ވިދާޅުވީ ފަތުރުވެރިކަމާއި އެ ނޫން ވެސް އިގްތިސާދީ ފުރުސަތުތައް ފަހިވެފައިވާ ކުދިކުދި އާބާދީތަކުގެ ކައުންސިލު އިދާރާތަކުގައި މަސައްކަތްކުރާނެ އިދާރީ މުވައްޒަފުން ނުލިބުމުގެ މައްސަލަ އިތުރުވަމުން އަންނަ ކަމަށެވެ. އަދި ކަމާ ގުޅޭ މައައްސަސާތަކާ އެކު އެ މައްސަލަ ހައްލުކުރުމަށް ވެސް މަސައްކަތް ކުރައްވަމުން ގެންދަވާ ކަަމަށް ޝަރީފް ވިދާޅުވި އެވެ.
ރަކީދޫއަކީ ގާތްގަނޑަކަށް 60 އެއްހާ މީހުން އުޅޭ ރަށެކެވެ. އާބާދީ ކުޑަވުމުގެ ސަބަބުން ރަށުން ހިދުމަތް ނުލިބޭތީ ގިނަ ބަޔަކު އުޅެނީ ރަށުން ބޭރުގަ އެވެ.