އަތްފޯރާ އަގެއްގައި ބޯހިޔާވަހިކަން ފޯރުކޮށްދިނުމަށް ހިންގާ "އެފޯޑަބަލް ހޯމް އޯނަޝިޕް ސްކީމް"ގައި އިމާރާތްކުރާ ތިން ކޮޓަރީގެ އެޕާޓްމަންޓެއް ވިއްކޭނެ އެންމެ މަތީ އަގަކީ 2.3 މިލިއަން ރުފިޔާ ކަމަށް ހައުސިން މިނިސްޓްރީން މިއަދު ބުނެފި އެވެ.
އެ މިނިސްޓްރީން ހިއްސާކުރި މައުލޫމާތުގައިވާ ގޮތުން، ކޮންޓްރެކްޓާ ފައިނޭންސް އުސޫލުން ހިންގާ ޕްރޮޖެކްޓުގައި، ހުޅުމާލެ 3 ގައި 1،000 ފްލެޓު އަޅާނީ ޖުމްލަ ފަސް ސަރަހައްދެއްގަ އެވެ. ކޮންމެ ތަނެއްގައި އަޅާނީ 200 ހައުސިން ޔުނިޓެވެ.
އެތަންތަން އަޅައިދޭނެ ބަޔަކު ހޯދަން މިނިސްޓްރީން ވަނީ މިދިޔަ ބުރާސްފަތި ދުވަހު ހުޅުވާލައިފަ އެވެ. އެ މުއްދަތު މި މަހުގެ 23 ގައި ހަމަވާނެ އެވެ.
މިނިސްޓްރީގެ މައުލޫމާތުގައިވާ ގޮތުން ތިން ކޮޓަރީގެ އެޕާޓްމަންޓުތަކުގައި 950 އަކަފޫޓު ހުންނާނެ އެވެ. އެ ތަންތަން ވިއްކަން ކަނޑައަޅާފައިވާ އެންމެ މަތީ އަގަކީ 2.3 މިލިއަން ރުފިޔާ އެވެ. ދެ ކޮޓަރީގެ ތަންތަނުގައި ހުންނާނީ 700 އަކަފޫޓެވެ. އެ ތަންތަނުގެ އެންމެ މަތީ އަގަކީ 1.8 މިލިއަން ރުފިޔާ އެވެ.
"ކޮންމެ ތަނެއްގައި މަދުވެގެން 70 ޕަސެންޓު ހުންނަން ޖެހޭނީ ތިން ކޮޓަރީގެ އެޕާޓްމަންޓު. އެ ތަންތަނުގައި ކާރު ޕާކުކުރާނެ ޖާގަ ވިއްކޭނެ އެންމެ މަތީ އަގަކީ 450،000ރ،" މިނިސްޓްރީން ހިއްސާކުރި މައުލޫމާތުތަކުގައިވެ އެވެ.
އެޕާޓްމަންޓުތައް އަޅަން މިނިސްޓްރީން ބިން ދެނީ އަގަކާ ނުލަ އެވެ. އަދި އެ ބިން ހަވާލުކުރާތާ 30 މަސް ދުވަހުގެ ތެރޭގައި މަސައްކަތް ނިންމަންޖެހެ އެވެ.
އަތްފޯރާފަށުގައި ބޯހިޔާވަހިކަން ފޯރުކޮށްދިނުމާއި އުމްރާނީ ތަރައްގީ އަށް އެހީތެރިވުމާއި ދިވެހިންގެ ދިރިއުޅުމުގެ ފެންވަރު މަތިކުރުމުގެ މަސައްކަތްތަކުގެ ތެރޭގައި ހިމެނޭ އެ ޕްރޮޖެކްޓުގެ ސަބަބުން ރާއްޖޭގެ ރިއަލް އެސްޓޭޓް ޑިވެލޮޕަރުންނަށް، ބޯހިޔާވަހިކަމުގެ މަޝްރޫއުގެ ތެރެއިން އެ މީހުންގެ ގާބިލްކަން އިތުރުކުރުމުގެ ފުރުސަތު ފަހިވާނެ ކަމަށް ވެސް އެ މިނިސްޓްރީން ބުންޏެވެ.
މި މަޝްރޫއުގެ ދަށުން ބީއެމްއެލް އެފޯޑަބަލް ހޯމް ލީސިން ކޮމްޕެނީން ހުޅުމާލޭގައި މިހާރު ވަނީ މަސައްކަތް ފަށައިފަ އެވެ. އެ ފްލެޓުތަކުގެ މަސައްކަތްތައް ނިންމައި 2028 ވަނަ އަހަރުގެ މެދުތެރޭގައި އެ ތަންތަން އާންމުންނަށް ދޫކުރަން ފަށާނެ ކަމަށް އެ ބޭންކުގެ ސީއީއޯ އަދި އެމްޑީ މުހައްމަދު ޝަރީފު ވަނީ ވިދާޅުވެފަ އެވެ. އެ ކުންފުނިން ފަސް ކޮންޓްރެކްޓަރަކާ ހަވާލުކޮށްގެން އިމާރާތް ކުރަމުން އަންނަ 3،260 ފްލެޓުގެ އަމަލީ މަސައްކަތް ފެށީ މިދިޔަ ޑިސެމްބަރު މަހު ފަހުކޮޅު އެވެ. އެ ފްލެޓުތައް އިމާރާތް ކުރަނީ ހުޅުމާލެ 1، ހުޅުމާލެ 3 އަދި ވިލިމާލޭގަ އެވެ.