ޗާގޯސްގެ ޖަޒީރާ ރަށްތަކާ މެދު އުފެދިފައިވާ ހިލާފުތަކާ ގުޅިގެން، ރާއްޖެއާ އެކު ހާރިޖީ ގުޅުން ސަސްޕެންޑްކުރަން މޮރިޝަސްގެ ސަރުކާރުން ނިންމި ނިންމުމަކީ ތާކުންތާކު ނުޖެހޭ ނިންމުމެއް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އޮފީހުގައި ނޫސްވެރިންގެ ބައްދަލުވުމުގައި ރައީސް ވިދާޅުވީ ރާއްޖެއާ ގުޅުން ކަނޑާލަން މޮރިޝަސްއިން ނިންމި ނިންމުމަކީ ވަރަށް ތާކުންތާކު ނުޖެހޭ ނިންމުމެއް ކަމަށާއި އެ ނިންމުން އެގޮތަށް ނިންމުމަކުން ހަގީގަތް ބަދަލުނުވާ ކަމަށެވެ.
ރައީސް ވިދާޅުވީ ރާއްޖެއާ ގުޅުން ކަނޑާލިޔަސް މޮރިޝަސްއަށް ހައްގު ނޫން ތަނެއް އެ ގައުމަށް ހައްގު ނުވާނެ ކަމަށެވެ. އެއްވެސް ގައުމަކާ ޗާގޯސް ހަވާލުކުރާ ނަމަ، ކުރަން ޖެހޭނީ އެ ތަނުގެ ހައްގުވެރި ފަރާތާ ކަމަށާއި އެއީ ރާއްޖެ ކަމަށް އެ މަނިކުފާނު ވިދާޅުވި އެވެ.
"އެހެންވީމަ އެ ފެކްޓް ބަދަލެއް ނުވާނެ ގައުމަކުން މި ގައުމާ ގުޅުން ކަނޑާލުމަކުން. މަޝްވަރާ ކުރުމެއް ނެތި އަމިއްލަފުޅަށް ނިންމުމެއް ނިންމީ ވަރަށް ނައިވް، ވަރަށް އިމެޗުއާ. ރާއްޖޭގެ ސްޓޭންޑް ބަދަލެއް ނުވާނެ. ރާއްޖެ ކުރިއަށް ދާނީ މޯލްޑިވްސް ފަސްޓް ޕޮލިސީއާ އެކީގަ،" ރައީސް ވިދާޅުވި އެވެ.
އިނގިރޭސި ވިލާތުން ޗާގޯސްގެ ރަށްތައް މޮރިޝަސް އަށް ދޫކޮށްލުމަށް ނިންމާފައިވާ ނިންމުން ހުއްޓުވުމަށް، އެކަމާ ދެކޮޅަށް ގާނޫނީ ގޮތުން މަސައްކަތް ކުރުމަށް ރާއްޖޭން ތައްޔާރުވަމުން އަންނަ ކަމަށް ސަރުކާރުން ވަނީ ބުނެފަ އެވެ.
އިނގިރޭސި ބޮޑުވަޒީރު ކިއާ ސްޓާމާ ޗާގޯސްގެ ސިޔާދަތީ ބާރު މޮރިޝަސް އަށް ދިނުމަށް ނިންމާފައިވާ ނިންމުމާ ދެކޮޅަށް ގާނޫނީ ގޮތުން ކުރެވެން ހުރި ކަންކަން ދިވެހި ސަރުކާރުން އަންނަނީ ދިރާސާ ކުރަމުންނެވެ. ރާއްޖެއިން ގަބޫލުކުރާ ގޮތުގައި އެ ރަށްތަކުގެ މައްޗަށް ރާއްޖޭގެ ސަރަހައްދީ ހައްގުތައް، މޮރިޝަސް އިން ކުރާ ދައުވާ އަށް ވުރެ މާ ވަރުގަދަ އެވެ.
ޗާގޯސް ޖަޒީރާގެ ސިޔާދަތީ ބާރާ ގުޅޭގޮތުން އެއްވެސް ގައުމަކާ ދެކޮޅަށް އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) ރާއްޖެ އިން ރަސްމީކޮށް މައްސަލައެއް ހުށަހަޅާފައެއް ނެތަސް މިހާރު ސަރުކާރުން އަންނަނީ މިކަމުގައި ކުރެވެން ހުރި ކަންކަން ދިރާސާ ކުރަމުން ކަމަށް ވެސް ވަނީ ބުނެފަ އެވެ.
މިކަމާ ގުޅޭ ފުރިހަމަ ގާނޫނީ ރިވިއުއެއް ހަދަމުން އަންނަ ކަމަށާއި އަދި ބައިނަލްއަގުވާމީ ގާނޫނީ މާހިރުންނާއި ރާއްޖޭގެ ކަމާބެހޭ އިދާރާތަކާ އެކު މަޝްވަރާތައް ދަނީ ކުރިއަށް ކަމަށް ސަރުކާރުން ބުނެ އެވެ.
އެއްބަސްވުމާ މެދު ރާއްޖޭގެ ހާރިޖީ ކަންބޮޑުވުންތައް އިނގިރޭސި ސަރުކާރާ ރަސްމީކޮށް ހިއްސާކޮށްފައިވެ އެވެ. އެގޮތުން ނޮވެމްބަރު 2024 އާއި އެންމެ ފަހުން ޖެނުއަރީ 2026 ގައި ވެސް އިނގިރޭސި ވިލާތަށް މިކަމާ ގުޅިގެން ސިޓީ ފޮނުވާފައިވެ އެވެ.