މއ. ރިމްލާސްގައި ރޭ މެންދަމު އަލިފާނުގެ ހާދިސާ ހިނގިއިރު، އެ ގޭގައި ދިރިއުޅެމުން އައި ހަތް މީހަކަށް ވަގުތީ ބޯހިޔާވަހިކަން ފޯރުކޮށްދީފި އެވެ.
ނޭޝަނަލް ޑިޒާސްޓާ މެނޭޖްމަންޓް (އެންޑީއެމްއޭ) އިން މިއަދު ބުނީ އަލިފާނުގެ ހާދިސާގައި އެ ގޭގައި ދިރިނޫޅެވޭ ވަރުގެ ބޮޑެތި ގެއްލުންތަކެއް ލިބިފައިވާތީ އެ އާއިލާ އަށް ބޭނުންވާ ކެއުމާއިބުއިމާއި ވަގުތީ ބޯހިޔާވަހިކަމުގެ އެހީތެރިކަން ދީފައިވާ ކަމަށެވެ.
އެންޑީއެމްއޭގެ ސީއީއޯ ހިސާން ހަސަން "މިހާރު" އަށް ވިދާޅުވި ގޮތުގައި އެ ގޭގައި ހަތް މީހަކު އައީ ދިރިއުޅެމުންނެވެ. އެއީ އުމުރުން 18 އަހަރުން ދަށުގެ ތިން އަންހެން ކުދިންނާއި 18 އަހަރުން މަތީގެ އަންހެނެއްގެ އިތުރުން 18 އަހަރުން މަތީގެ ތިން ފިރިހެނުން ކަމަށް ހިސާން ވިދާޅުވި އެވެ.
ހިސާން ވިދާޅުވީ އެ މީހުންނަށް ފަސް ދުވަހަށް ބޭނުންވާ ކެއުމާއި ހުރުން ހަމަޖައްސައި ދީފައިވާ ކަމަށެވެ.
ރޭ ދަންވަރު 3:06 ހާއިރު އަލިފާން ރޯވެގެން އެމްއެންޑީއެފްގެ ފަޔާ އެންޑް ރެސްކިއު ސާވިސް އިން އެ ސަރަހައްދަށް ގޮސް، އަލިފާން ނިއްވުމަށް ކުރި މަސައްކަތުން އަލިފާން ނިއްވާލެވުނީ ގާތްގަނޑަކަށް ގަޑިއެއްހާއިރުގެ މަސައްކަތުންނެވެ.
އެކަމަކު އަލިފާން ނިއްވާލެވުނުއިރު އެ ގޭގެ އެކި ބައިތަކަށް ގެއްލުންވެފައިވާ ކަމަށް އެމްއެންޑީއެފުން ބުންޏެވެ.