އެމެރިކާ އާއި އިޒްރޭލުން ދިން ހަމަލާތަކުގައި އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމަކީ ވަރަށް ފިނޑި، އަދި ނުބައި އަމަލެއް ކަމަށާއި މުސްލިމުންގެ އަދުއްވުންގެ އެ އަމަލަށް ރުހިގެން ތިބެގެން ނުވާނެ ކަމަށް ކުރީގެ ރައީސް މައުމޫން އަބްދުއްގައްޔޫމް ރޭ ވިދާޅުވެއްޖެ އެވެ.
މައުމޫން ފައުޑޭޝަންގެ ފަރާތުން މި ރޯދަމަހު ބާއްވާ އިހުޔާ ޕްރޮގްރާމްގެ ރޭގެ ޖަލްސާގައި މައުމޫން ވިދާޅުވީ އީރާނުގެ އެންމެ މަތީ ލީޑަރު ވަރަށް އަނިޔާވެރި ހަމަލާއެއް ދީގެން ޝަހީދުކޮށްލުމަކީ މުޅި އުއްމަތަށް ލިބުނު ވަރަށް ބޮޑު ހިތާމައެއް ކަމަށާއި އެއީ އެއްގޮތަކަށް ވެސް ވެގެންވާނެ ކަމެއް ނޫން ކަމަށެވެ.
"އެމަނިކުފާނުގެ އޮފީސްކޮޅުގަ މަސައްކަތުގައި އިންނަވަނިކޮށް މަތިން އައިސް ބޮން އަޅާ އަވަހާރަކޮށްލީ. މިއީކީ ހަނގުރާމައެއް ނޫން. މިއީ އަނިޔާވެރިކަމުގެ އިންތިހާ އަމަލެއް. އިނގިރޭސި ބަހުން ބުނާ ނަމަ މާޑާއެއް. މީހަކު ގަސްދުގައި މަރާލުން. އެއްގޮތަކަށް ވެސް ހަނގުރާމައެއް ކޮށްގެން އެމަނިކުފާނު ޝަހީދުވީއެއް ނޫން،" މައުމޫން ވިދާޅުވި އެވެ.
މައުމޫން ވިދާޅުވީ މުސްލިމުންގެ އަދުއްވުންގެ ފަރާތުން ފެންނަނީ ވަަރަށް ނުބައި، އަނިޔާވެރި އަމަލުތައް ކަމަށާއި މުސްލިމު ގައުމެއްގައި ވެރިއަކު އިންތިހާބު ކުރާއިރަށް ހަމަލާދީ، މަރާލަނީ ކަމަށެވެ. އެފަދަ އަމަލުތަކަށް ރުހިގެން، ގަބޫލު ވެގެން ތިބެގެން ނުވާނެ ކަމަށާއި އެކަމާ ދެކޮޅަށް ތެދުވަން ޖެހޭނެ ކަމަށް އެމަނިކުފާނު ވިދާޅުވި އެވެ.
މުއުމިނުންނަކީ އެއް ބައެއް ކަމަށާއި ތިބެންޖެހޭނީ އެކަތިގަނޑެއްގެ ގޮތުގައި ކަން މައުމޫން ފާހަގަކުރެއްވި އެވެ.
އަދުއްވުންގެ ބަޔަކު މުސްލިމު އެއްވެސް ގައުމަކަށް ހަމަލާދީފި ނަމަ، މައުމޫން ވިދާޅުވި ގޮތުގައި ހުރިހާ މުސްލިމުން އެކަތިގަނޑަކަށް ވާން ޖެހެ އެވެ. އަދި އެބަޔަކާ ދެކޮޅަށް ހަމަލާދީ، ނުވަތަ އަމިއްލަ ބިމާއި ވަޒަން ދިފާއު ކުރަން ޖެހޭ ކަމަށް ވިދާޅުވި އެވެ.
މުސްލިމު ދެ ބައެއްގެ މެދުގައި ނުތަނަވަސްކަން އުފެދިފައިވީ ނަމަވެސް، އެކަން ފިލުވަން އެހެން މީހުން މަސައްކަތް ކުރަން ޖެހޭނެ ކަމަށް ވެސް މައުމޫން ފާހަގަކުރެއްވި އެވެ. އެގޮތުން އެ މަނިކުފާނު އިޝާރަތް ކުރެއްވީ އީރާނާއި މެދުއިރުމަތީގެ އެހެން ގައުމުތަކާ މެދު މިހާރު އޮތް ނުތަނަވަސްކަން ފިލުވަން މަސައްކަތް ކުރުމަށެވެ.
މައުމޫން ވިދާޅުވި ގޮތުގައި އަދުއްވުން މުސްލިމުންނަށް ހަމަލާދޭ ނަމަ، އެކަމުން ދިފާއުވާން ބާރު ތައްޔާރު ކުރަން މާތްﷲ ވެސް އަންގަވާފައިވެ އެވެ. އަދި ހަނގުރާމަ ކުރުމުގެ އުކުޅުތަކާއި އުޅަނދުތައް ވެސް ތައްޔާރުކުރާށެވެ. އަދުއްވުންނަށް ބިރު ދައްކަން ޖެހޭ ކަން ވެސް އެ މަނިކުފާނު ފާހަގަކުރެއްވި އެވެ.
މައުމޫން ވިދާޅުވީ މިހާރު ހިނގަމުންދާ ހަނގުރާމައަކީ އެއްވެސް އުސޫލެއް އޮވެގެން ހިނގާ ކަމެއް ނޫން ކަމަށާއި ބާރު އޮތް ބަޔަކު ވަގުތުން ކަންތައްތަކެއް ކުރަމުން ގެންދަނީ ކަމަށެވެ. ބާރު އޮތަތީ ތަންތަނަށް ބޮން އަޅައި މީހުން މަރައި، ގެދޮރު ސުންނާފަތި ކުރަމުންދަނީ ކަމަށެވެ.
"ހަނގުރާމައަކީ ވެސް ކުރަން ނުޖެހޭ އެއްޗެއް. އެ ކުރަން ޖެހޭ ހާލަތުގައި ވެސް އެއީ ވަކި އުސޫލަކުން ކުރަން ޖެހޭ އެއްޗެއް. އެއްގޮތަކަށް ވެސް ބޭނުންހާ ގޮތަކަށް މީހުންތައް މަރައި ތަންތަން ސުންނާފަތިކޮށްގެން ނުވާނެ،" މައުމޫން ވިދާޅުވި އެވެ.
"މިހާރު މި ހިނގާ ކަންތައްތަކީ ހަމަ ފިނޑި ކަންތައްތަކެއް. ފިނޑި ކަމުގެ ކޮޅެއް ވެސް ނެތް އަމަލުތަކެއް."
މައުމޫން މީގެ ކުރިން ވަނީ އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުން އިހްލާސްތެރި މުސްލިމެއްގެ ހައިސިއްޔަތުން ކުށްވެރިކުރައްވާ ކަމަށް ވިދާޅުވެފަ އެވެ. އަދި އެ ހިތާމައިގައި ޚާމަނާއީގެ އާއިލާ އަށް ތައުޒިޔާ ފޮނުއްވާ ކަމަށާއި އަދި އީރާނުގެ ރައްޔިތުންނަށް ހިތްވަރު ދެއްވުމަށް ދުއާ ކުރައްވާ ކަމަށް ވެސް މައުމޫން ވިދާޅުވެފައިވެ އެވެ.
ޚާމަނާއީ އަވަހާރަކޮށްލުން ކުރީގެ ރައީސް މައުމޫން ކުށްވެރިކުރެއްވިއިރު، މިހާތަނަށް ސަރުކާރުން އެކަމާ ގުޅިގެން އެއްޗެއް ނުބުނެ އެވެ. އަދި ރާއްޖޭގެ އެހެން އިސް ލީޑަރެއް ވެސް ޚާމަނާއީ އަވަހާރަކޮށްލުން ކުށްވެރި ކުރައްވާފައެއް ނުވެ އެވެ.
ޚާމަނާއީ އަވަހާރަކޮށްލުމާ ގުޅިގެން ރާއްޖޭން ރަސްމީކޮށް ތައުޒިޔާ ފޮނުވައިފައެއް ނުވެ އެވެ. އަދި، މީގެ ކުރިން އީރާނުގެ އިސް ލީޑަރުން އަވަހާރަވުމުން ވެސް ގައުމީ ދިދަ ބައި ދަނޑިއަށް ތިރިކުރި ނަމަވެސް، މިފަހަރު އެ އުސޫލަށް އަމަލެއް ނުކުރެ އެވެ.
އެކަމާ ގުޅިގެން ނޫސްވެރިން ރައީސް ޑރ. މުހައްމަދު މުއިއްޒާ ސުވާލުކުރުމުން އެ މަނިކުފާނު ވިދާޅުވީ، ހަނގުރާމާގައި ކޮންމެ މުސްލިމަކު މަރުވިޔަސް އެއީ ހިތާމައެއް ކަމަށެވެ.
ޚާމަނާއާ އަވަހާރަވުމާ މެދު ސީދާ ގޮތުން އެއްޗެއް ވިދާޅުނުވެ، ރައީސް ވިދާޅުވީ އެކަމުގައި ރާއްޖެ އޮންނާނީ އަރަބި އިސްލާމިކް ގައުމުތަކާ އެއް ސްޓޭންޑެއްގައި ކަމަށެވެ. ރައީސް މުއިއްޒު ވިދާޅުވީ އެމެރިކާ އާއި އިޒްރޭލު އަދި އީރާނުން ދެމުންދާ ހަމަލާތައް އެ މަނިކުފާނު ކުށްވެރިކުރާ ކަމަށެވެ.
ރައީސް ވިދާޅުވެފައިވަނީ މެދުއިރުމަތީގައި ފަށާފައިވާ ހަނގުރާމައާ ގުޅިގެން ރާއްޖޭގެ ތާއީދު އޮތީ އަރަބި ގައުމުތަކާ އެކުގައިކަން ހާމަކުރަން އެ ގައުމުތަކުގެ ވެރިންނާ ވާހަކަފުޅު ދައްކަވަމުން ގެންދަވާ ކަމަށެވެ. އީރާނަށް އެމެރިކާ އާއި އިޒްރޭލުން ދިން ވަރުގަދަ ހަމަލާތަކުގެ ރައްދެއްގެ ގޮތުން އީރާނުން ގެންދަނީ އަވަށްޓެރި އަރަބި ގައުމުތަކުގައިވާ އެމެރިކާގެ އަސްކަރީ މަރުކަޒުތަކަށް ވަރުގަދަ މިސައިލް ހަމަލާތައް ދެމުންނެވެ.