އެޕަލް އިން މިހާތަނަށް މެކްބުކް އެންމެ އަގު ހެޔޮކޮށް ވެސް ވިއްކަމުން އައީ 999 ޑޮލަރަށް ކަމަށް ވިޔަސް މި އަގު 599 ޑޮލަރަށް ތިރިކޮށް ތަފާތު ރީތި ކުލަތަކެއްގެ މެކްބުކްތަކެއް މިއަދު ތައާރަފްކޮށްފި އެވެ.
މިއީ އައިފޯން ގްރޭޑް ޗިޕް ބޭނުންކޮށްގެން އުފައްދާފައިވާ ކުލަ ރީތި ލުއި ލެޕްޓޮޕެއް ކަމަށްވާ "މެކްބުކް ނިއޯ" އެވެ.
އެޕަލް އިން ވަނީ އައިފޯން 17 ގެ އަގު ހެޔޮ ވާޝަނެއް ކަމަށްވާ 17އީ އާއި އައިޕެޑް އެއާ އަދި މެކްބުކް ޕްރޯގެ މުޅި ލައިން އެއްކޮށް އާކޮށްފަ އެވެ.
މެކްބުކް ނިއޯ އަކީ އެޕަލް އިން 10 އަހަރަށް ވުރެ ގިނަ ދުވަސް ފަހުން ބާޒާރަށް ނެރޭ ފުރަތަމަ ބަޖެޓް މެކް އެވެ. އަދި މިއީ ގޫގުލްގެ ކްރޯމްބުކް އާއި އަލަށް މިފަދަ އުފެއްދުންތައް ގަންނަ މީހުންނާއި ކްލާސްރޫމްތަކުގައި ބޭނުންކުރުމަށް އާންމުކޮށް ގަންނަ އެންޓްރީ ލެވަލްގެ ވިންޑޯޒްގެ އުފެއްދުންތަކަށް ގޮންޖެހުމެއްގެ ގޮތުގައި ވަނީ ބެލެވިފަ އެވެ.
"ސީދަލަށް ބުނާ ނަމަ މި ފެންވަރުގެ އެހެން ލެޕްޓޮޕެއް ނުލިބޭނެ،" އެޕަލްގެ ހާޑްވެއާ އިންޖިނިއަރިންގެ ސީނިއާ ވައިސް ޕްރެޒިޑެންޓް ޖޯން ޓާނަސް ވިދާޅުވި އެވެ.
މި ލެޕްޓޮޕްގައި 13 އިންޗީގެ ޑިސްޕްލޭއެއް ހިމެނޭއިރު ބަރުދަނަކީ 2.7 ޕައުންޑް (1.2 ކިލޯގްރާމް) އެވެ. މެޓަލް ބޮޑީއަކާ އެކު އެޕަލްގެ އެހެން ނޯޓްބުކް ލައިންއަޕްތަކަށް ވުރެ މީގެ ފިނިޝިން "ކަލަފުލް" އެވެ.
މެކްބުކް އެއާއާ އަޅާބަލާއިރު 500 ނިޓްގެ ބްރައިޓްނެސް އާއި ދެ ޔޫއެސްބީ-ސީ ޕޯޓް އަދި ހެޑްފޯން ޖެކެއް ވެސް މި މެކްގައި ހިމެނެ އެވެ. ބޭސް މޮޑެލްގައި 256 ގިގަބައިޓްގެ ސްޓޯރޭޖް ހިމެނޭއިރު 100 ޑޮލަރު އަގު ބޮޑު ވާޝަންގައި ޓަޗް އައިޑީ ވެސް ހިމެނެ އެވެ. ދަރިވަރުންނަށް މި މެކްތަކުން 100 ޑޮލަރުގެ ޑިސްކައުންޓް ލިބެ އެވެ.
- އަގު: 599 ޑޮލަރު (ދަރިވަރުންނަށް 499 ޑޮލަރު)
- 16 ގަޑިއިރުގެ ބެޓެރީ ލައިފް
- 13 އިންޗީގެ ޑިސްޕްލޭ، 500 ނިޓްސް
- އޭ18 ޕްރޯ ޗިޕް
- 256 ޖީބީ ނުވަތަ 512 ޖީބީ ސްޓޯރޭޖް
- ހަތަރު ކުލަ: ސިލްވަރ، އިންޑިގޯ، ބްލަޝް އަދި ސިޓްރަސް
- ބަރުދަނު: 2.7 ޕައުންޑް
- ވައިފައި 6އީ އަދި ބްލޫޓޫތު6ކަނެކްޓިވިޓީ
- 8 ޖީބީ ރޭމް
- 1080p ފްރަންޓް ފޭސިން ކެމެރާ، ޑައިރެކްޝަނަލް ބީމްފޯމިންއާ އެކު ޑުއަލް މައިކް އަދި ސްޕޭޝަލް އޯޑިއޯ ހިމެނޭ ޑުއަލް ސައިޑް-ފަޔަރިން ސްޕީކަރު
- މާޗް 11 އިން ފެށިގެން ލިބެން ހުންނާނެ
އެޕަލްގެ އެންމެ ފަހުން ފޯން މޮޑެލް ކަމަށްވާ އައިފޯން 17 ގެ އާދައިގެ ވާޝަނެއްގެ ގޮތުގައި މި ހަފްތާގައި ނެރުނު އައިފޯން 17އީ ގެ ފެށޭ އަގަކީ 599 ޑޮލަރެވެ. މީގައި ހިމެނެނީ އައިފޯން 17 ގެ ކުރީގެ މޮޑެލްގައި ވެސް ބޭނުންކުރާ ޕްރޮސެސަރެވެ. އެކަމަކު ކުޑަ ޑިސްޕްލޭއެކެވެ. އަދި ދެ ކެމެރާގެ ބަދަލުގައި އެއް ކެމެރާ އަދި އެޕްތަކުގެ މައުލޫމާތު ދައްކާ ޑައިނަމިކް އައިލެންޑް ޕެނަލެއް ވެސް ނެތެވެ. މި ޑިވައިސް ވެސް މި މަހުގެ 11 ގައި ވިއްކަން ފަށާނެ އެވެ.