ދާދި ފަހުން ޕީއެސްޖީ އަށް ބަދަލުވި ސްޕެއިނުގެ ވޯލްޑް ކަޕް ބަތަލު ފެރަން ޓޮރޭސް އޭނާގެ އަލަތު މެޗުގައި ދެ ގޯލު ޖަހައި، ރޭނިސް އަތުން ބަލިނުވެ ޕީއެސްޖީ 2-2 އިން އެއްވަރުކޮށްދީފި އެވެ.
އާޖެންޓީނާ އަތުން 1-0 އިން ސްޕެއިން މޮޅުވެ ވޯލްޑް ކަޕް ކާމިޔާބުކުރި މެޗުގައި ބަދަލު ކުޅުންތެރިއެއްގެ ގޮތުގައި އަރައި ގޯލު ޖެހި ޓޮރޭސް މި ފަހަރުގެ ޓްރާންސްފާގައި ޕީއެސްޖީ އަށް ބަދަލުވީ ބާސެލޯނާ އިން 50 މިލިއަން ޔޫރޯ އަށެވެ.
ފްރާންސް ލީގުގައި ޕީއެސްޖީ ކުޅުނު ފުރަތަމަ މެޗުގެ ފުރަތަމަ އެގާރައިގައި ޓޮރޭސް ނުހިމަނަ އެވެ. ޔޫރަޕުގެ ޗެމްޕިއަން ޕީއެސްޖީން ޓޮރޭސް ގެންދިޔައީ ވެސް، އުސްމާނޭ ޑެމްބެލޭގެ ބަދަލުގައި އަރުވާށެވެ.
ރޭނިސްގެ ދަނޑުގައި ކުޅުނު މެޗުގެ ނުވަ ވަނަ މިނެޓުގައި ސެބަސްޓިއަން ޒިމަންސިކް އެ ޓީމަށް ކުރި ހޯދައިދިނެވެ. އަދި ފުރަތަމަ ހާފުގެ ފަހުކޮޅު އެސްޓެބަން ލެޕައުލް ލީޑު ފުޅާކޮށްދިނެވެ. ދެ ވަނަ ހާފަށް ކުޅެން ނުކުތް ޓޮރޭސް ފުރަތަމަ ގޯލް ޖެހީ 71 ވަނަ މިނެޓުގަ އެވެ. އަދި އޭގެ 10 މިނެޓު ފަހުން ނަތީޖާ ހަމަހަމަކޮށްދިނެވެ.
"ވަރަށް އުނދަގޫ މެޗެއް މިއީ،" ޓޮރޭސް ބުންޏެވެ. "އެކަން އެނގޭ ކުރިން ވެސް."
ރޭގެ މެޗުގައި ޓޮރޭސް ލަނޑު ޖަހަން އެސިސްޓްކުރީ އޭނާއާ އެކު ސްޕެއިނަށް ކުޅޭ ފަބިއަން ރުއިޒް އެވެ. ޓޮރޭސް ވަނީ އޭނާ އަށް ވަރަށް ބޮޑަށް ތައުރީފުކޮށްފަ އެވެ.
"ފެންވަރުގެ މިޑްފީލްޑަރެއް ހުރިއްޔާ ރަނގަޅު ތަނަށް ދުވެ، ބޯޅަ ގޯލަށް އަމާޒުކޮށްލަން ޖެހޭނީ،"
ފްރާންސް ލީގުގައި ރޭ ލިލް ވަނީ އޮލިވިއޭ ޖިރޫގެ ގޯލާ އެކު އޭންގާސް އަތުން 2-0 އިން މޮޅުވެފަ އެވެ. ފްރާންސާ އެކު ވޯލްޑް ކަޕް ކާމިޔާބުކޮށްފައިވާ އުމުރުން 39 އަހަރުގެ ފޯވާޑް އަންނަނީ އެ އުމުރުގައި ވެސް ތަފާތު ދައްކަމުންނެވެ. ލިލްގެ ކޯޗަކީ ކާލޯ އަންޗެލޮޓީގެ ދަރިފުޅު ޑެވިޑޭ އަންޗެލޮޓީ އެވެ.