ޕެރަމައުންޓް ސްކައިޑާންސް އިން ވޯނާ ބްރޯސް ޑިސްކަވަރީ ގަތުމަށް ހުށަހަޅާފައިވާ 110 ބިލިއަން ޑޮލަރުގެ ބޮޑު މުއާމަލާތުގެ ފަހަތުގައި އަރަބި ގައުމުތަކުގެ މާލީ ބާރުވެރިކަން އޮތުމުން، މީޑިއާގެ މިނިވަންކަމާ މެދު ގިނަ ބަޔަކު ސުވާލު އުފައްދަމުންދާ ކަމަށް ރިޕޯޓްތައް ބުނެފި އެވެ.
ވެރައިޓީން އިއްޔެ ރިޕޯޓްކުރި ގޮތުގައި، ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑާއި ގަތަރު އިންވެސްޓްމަންޓް އޮތޯރިޓީ އަދި އަބޫ ދާބީގެ ލިމާދު ހޯލްޑިންގްސް ގުޅިގެން އެ މުއާމަލާތަށް 24 ބިލިއަން ޑޮލަރު އިންވެސްޓް ކުރެ އެވެ.
ވޯނާ ބްރަދާޒްއަކީ ސީއެންއެން އާއި ސީބީއެސް އަދި އެޗްބީއޯ ކަހަލަ ހުޅަނގުގެ ނުފޫޒުގަދަ މީޑިއާތަކުގެ ބެލެނިވެރި ފަރާތަށް ވުމުން، އެޑިޓޯރިއަލް މިނިވަން ކަމަށް އަރަބި ގައުމުތަކުގެ ނުފޫޒު ފޯރަފާނެ ކަމުގެ ބިރު އޮތް ކަމަށް އެ ރިޕޯޓުގައިވެ އެވެ.
ވޯނާ ބްރަދާޒް ގަންނަން ބިޑު ހުށަހެޅި ނަމަވެސް، ކާމިޔާބު ނުވި ދުނިޔޭގެ އެންމެ ބޮޑު ސްޓްރީމިން ހިދުމަތް ދޭ ނެޓްފްލިކްސްގެ ކޯ-ސީއީއޯ ޓެޑް ސަރަންޑޯސް ވިދާޅުވީ ހިޔާލު ފާޅުކުރުމުގެ މިނިވަން ކަމަށް އެހާ ބޮޑަށް އިސްކަން ނުދޭ ސަރަހައްދެއްގެ ފަންޑުތަކުން ހޮލީވުޑްގެ ބޮޑު ކުންފުންޏެއްގެ ކޮންޓްރޯލް ހޯދުމަކީ ގޯސް ހިޔާލެއް ކަމަށެވެ.
އަރަބި ގައުމުތަކުން މިފަދަ އިންވެސްޓްމަންޓްތައް ކުރަނީ ތެލަށް ބަރޯސާވާ މިންވަރު ކުޑަކޮށް، މުނިފޫހިފިލުވުމުގެ ދާއިރާއިން ދުނިޔޭގެ "ސޮފްޓް ޕަވާ" ނުވަތަ ނުފޫޒު ހޯދުމަށް ކަމަށް ވެރައިޓީގެ ރިޕޯޓުގައި ސިފަކޮށްފައިވެ އެވެ.
ޕެރަމައުންޓުން ބުނި ގޮތުގައި، މި އިންވެސްޓަރުންނަށް ކުންފުނީގެ ބޯޑު މެންބަރުކަން ނުވަތަ ވޯޓުލުމުގެ ހައްގެއް ނުލިބޭނެ އެވެ. އެހެންވެ، އެމެރިކާގެ ރެގިއުލޭޓަރީ އިދާރާތަކުން މި އެއްބަސްވުމަށް ހުރަސްއެޅުމުގެ ފުރުސަތު ކުޑަ އެވެ. ވަކިން ހާއްސަކޮށް، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ ދަށުން މި ކަހަލަ ބޭރުގެ އިންވެސްޓްމަންޓްތަކަށް ލުއިތަކެއް ލިބޭނެ ކަމަށް ބެލެވޭ ކަމަށް އެ ކުންފުނިން ބުނެފައިވެ އެވެ.
ރޮއިޓާސް އިން މިދިޔަ ހަފުތާގައި ރިޕޯޓްކުރި ގޮތުގައި، ނެޓްފްލިކްސް އެ ބިޑުން ވަކިވިތާ ދުވަހެއް ފަހުން، ޕެރަމައުންޓް ސްކައިޑާންސް އިން ވޯނާ ބްރަދާޒް ގަތުމުގެ އެއްބަސްވުން މިހާރު ވަނީ ފައިނަލް ކޮށްފަ އެވެ. އެ މުއާމަލާތުގެ އަގަކީ 110 ބިލިއަން ޑޮލަރު ކަމަށާއި، އޭގެ ތެރެއިން އިކުއިޓީ ވެލިއުގެ ގޮތުގައި ބަލަނީ 81 ބިލިއަން ޑޮލަރު ކަމަށް އެ ނޫހުގައި ބުނެފައިވެ އެވެ.