ބޮލީވުޑްގެ ތަރި ޔާމީ ގޯތަމް، އޭނާގެ ފިރިމީހާ އަދި ޑައިރެކްޓަރު އަދިތުޔާ ދަރުގެ ކުރިއަށް އޮތް ފިލްމު "ދުރަންދަރު: ދަ ރިވެންޖު" ބަލައިފައި އެ ފިލްމަށް ވަރަށް ބޮޑަށް ތައުރީފުކޮށްފި އެވެ.
ޔާމީ އެ ވާހަކަތައް ހިއްސާކުރީ މިދިޔަ ހަފުތާގައި ބޭއްވި "ނިއުސް18 ރައިޒިން ބާރަތު ސަމިޓު"ގަ އެވެ. އޭނާ ބުނި ގޮތުގައި، އެއީ "އާދަޔާ ހިލާފު މޮޅު" ފިލްމެކެވެ.
ޔާމީ ބުނީ އެ ފިލްމު ބަލާ ނިމުނުއިރު އޭނާ ހުރީ "އިމޯޝަނަލް" ވެފައި ކަމަށެވެ.
"އަހަރެން މިހާރު ދުރަންދަރު 2 ބަލައިފިން. އެއީ އާދަޔާ ހިލާފު މޮޅު ފިލްމެއް. ފިލްމު ބަލާފައި އަހަންނަށް ވަރަށް ބޮޑަށް އަސަރުކުރި. އެ ދުވަހު ފްލައިޓެއް އޮތުމުން އަދިތުޔާ ގާތު އެއްޗެކޭ ބުނާނެ ވަގުތެއް ނުވި. ނަމަވެސް މުޅި ދަތުރުމަތީގައި ވެސް އަހަރެންގެ ސިކުނޑީގައި އެނބުރެމުން ދިޔައީ އެ ފިލްމުގެ މަންޒަރުތައް،" ޔަމީ ބުންޏެވެ.
ޔާމީ ބުނީ މި ފިލްމު އުފެއްދުމަކީ އަދިތުޔަ މުޅި އުމުރު ދުވަހު ދުށް ހުވަފެނެއް ކަމަށާއި މިއީ ބެލުންތެރިން ދުވަހަކު ވެސް ހަނދާން ނުނެތޭނެ ވަރުގެ ފިލްމަކަށް ވާނެ ކަމަށެވެ.
"ދުރަންދަރު 2"ގައި ޔާމީ ހާއްސަ ފެނިލުމަކުން ފެންނާނެ ކަމަށް އަޑު ފެތުރިފައިވީ ނަމަވެސް، އޭނާ އެކަން ސީދާ ކަށަވަރުކޮށްދީފައެއް ނުވެ އެވެ.
ޔަމީ ބުނީ އެ ފިލްމު ރިލީޒްކުރާ ތާރީހު ކަމަށްވާ މި މަހުގެ 19 ވަނަ ދުވަހު އޭނާ ވެސް ސިނަމާއަށް ދާނެ ކަމަށާއި، އެންމެންނާ އެތަނުން ބައްދަލުވާނެ ކަމަށެވެ.
"ދުރަންދަރު"ގެ ފުރަތަމަ ފިލްމަށް ބޮކްސް އޮފީހުގައި 1،000 ކްރޯޑް ރުޕީސްއަށް ވުރެ ބޮޑު އާމްދަނީއެއް ލިބިފައި ވާތީ، ދެވަނަ ބަޔަށް ކުރާ އުންމީދު ވަރަށް ބޮޑެވެ.
ރަންވީރު ސިންގު ލީޑް ރޯލު ކުޅޭ އެ ފިލްމުގެ މުހިންމު ރޯލުތައް ކުޅެފައި ވަނީ އަރުޖުން ރާމްޕާލް، އަކްޝޭ ކަންނާ، ސަންޖޭ ދަތު، އާރު މާދަވަން އަދި ރާކޭޝް ބޭދީ އެވެ.
މި ފިލްމު ރިލީޒްކުރަނީ ދެކުނު އިންޑިއާގެ ތަރި ޔަޝްގެ އާ ފިލްމު "ޓޮކްސިކް"އާ އެއް ދުވަހެއްގައި ކަމަށް ވާތީ، ވާދަވެރިކަން ވަރަށް ބޮޑުވާނެ ކަމަށް ބެލެވެ އެވެ.