އިންޑިއާގެ މަޝްހޫރު ލަވަކިޔުންތެރިޔާ އަރްޖިތު ސިންގް، ފިލްމުތަކަށް ލަވަކިޔުން ހުއްޓާލުމަށް ނިންމުމަށް ފަހު، އޭނާގެ ފުރަތަމަ އަމިއްލަ ލަވަ "ރައިނާ" އިއްޔެ ރިލީޒްކޮށްފި އެވެ.
މިއުޒިކް ޑައިރެކްޓަރު ޝޭކަރް ރަވްޖިއާނީއާ ގުޅިގެން ނެރުނު މި ލަވައާ އެކު، އަރްޖިތުގެ ފޭނުން ބުނަމުން އަންނަނީ "އަރްޖިތު ފަދަ ދެވަނަ އެހެން ލަވަކިޔުންތެރިއަކު ނެތް" ކަމަށެވެ.
މި ލަވަ ނެރުމާ އެކު، ގިނަ ބަޔަކު ދަނީ އަރްޖިތުގެ އަސަރުގަދަ އަޑަށް ތައުރީފު ކުރަމުންނެވެ.
ބައެއް ފޭނުން ބުނެފައި ވަނީ އޭނާއަކީ އަދިވެސް އިންޑިއާގެ "ނަންބާ ވަން" ކަމަށާއި، އޭނާ ލަވަކިޔާ ގޮތް ވަރަށް ތަފާތުވެފައި ހިތްތަކާ ކުޅެލާ ކަމަށެވެ.
ފިލްމުތަކަށް ލަވަކިޔުން ހުއްޓާލިކަން މިދިޔަ ޖެނުއަރީ މަހު ކުއްލި ގޮތަކަށް އިއުލާންކޮށް އަރްޖިތު ބުނީ އޭނާ މިހާރު ބޭނުންވަނީ ކްލެސިކަލް މިއުޒިކަށް އިސްކަންދީ، އޭނާ އެންމެ ކުރާހިތްވާ މަސައްކަތްތަކަށް ވަގުތު ހުސްކުރަން ކަމަށެވެ.
އިންޑިއާގައި މިވަގުތު ހުރި އެންމެ މަގުބޫލު ފިރިހެން ލަވަކިޔުންތެރިޔާ އަރްޖިތު ބުނި ގޮތުގައި، ފިލްމުތަކަށް ލަވަކިޔުމުގެ އިތުރު ޕްރޮޖެކްޓުތަކާ ހަވާލުވުން ހުއްޓާލި ނަމަވެސް، އަދިވެސް ނުނިމި ހުރި ގިނަ މަސައްކަތްތަކެއް އެބަހުއްޓެވެ.
ނުނިމި ހުރި ލަވަތަކުގެ ލިސްޓު ވަރަށް ދިގު ކަމަށާއި މި އަހަރުގެ ނިޔަލަށް ނުވަތަ އަންނަ އަހަރުގެ ތެރޭގައި ވެސް އޭނާ ފިލްމުތަކަށް ކިޔާފައިވާ އާ ލަވަތައް ރިލީޒްވަމުން ދާނެ ކަމަށް އަރްޖިތު ބުންޏެވެ.
އަރްޖިތަކީ މިހާރު އިންޑިއާގެ މިއުޒިކް އިންޑަސްޓްރީގައި އެންމެ ބޮޑު އެއް ނަމެވެ. ބޮލީވުޑްގެ ކޮންމެ ފިލްމެއްގައިހެން އޭނާގެ ލަވައެއް ހިމެނެ އެވެ.
އިންޑިއާގެ ރިއަލިޓީ ޝޯ "ފޭމް ގްރުކުލް"ގައި 2005 ވަނަ އަހަރު ބައިވެރިވި، އިންޑިއާގެ ވެސްޓް ބެންގޯލްއަށް އުފަން އަރްޖިތު ބޮޑަށް މަޝްހޫރުވީ 2013 ވަނަ އަހަރު ނުކުތް ބޮލީވުޑްގެ ފިލްމު "އާޝިގީ 2"އަށް ކިޔައިދިން ލަވަ "ތުމް ހީ ހޯ" އިންނެވެ. އޭގެ ފަހުން "ޗަންނާ މޭރެޔާ" އާއި "ރާބްތާ" އާއި "ކޭސަރިޔާ" އަދި "ގެރުއާ" ކަހަލަ މަޝްހޫރު އެތައް ލަވައެއް އޭނާ ފިލްމުތަކަށް ކިޔައިދީފައިވެ އެވެ.