މިފްކޯ އިން އެ ކުންފުނީގެ ޕްރިއަމް ބްރޭންޑެއް ފުރަތަމަ ފަހަރަށް ތައާރަފުކޮށް، އެ ބްރޭންޑުގެ ދަށުން ފަސް އުފެއްދުމެއް ރޭ ބާޒާރަށް ނެރެފި އެވެ.
ދައުލަތުގެ މަސް ކުންފުނީގެ ޕްރިމިއަމް ބްރޭންޑުގެ ނަމަކީ "ރަންވަރު" އެވެ. އެއީ މިފްކޯގެ ފަސްމީރު ބްރޭންޑުގެ ދަށުން ނެރުނު ޕްރިމިއަމް އުފެއްދުންތަކަށް ހާއްސަ ނަމެއް ކަމަށް އެ ކުންފުނިން ބުންޏެވެ.
އެއީ ޕްރިމިއަމް އުފެއްދުންތަކަށް ހާއްސަކޮށް މިފްކޯއިން ވަކި ބްރޭންޑެއް ތައާރަފުކުރި ފުރަތަމަ ފަހަރު ވެސް މެ އެވެ.
ރަންވަރު ބްރޭންޑަކީ މިފްކޯގެ އުފެއްދުންތައް އިތުރުކޮށް، ކުންފުނީގެ ވިޔަފާރި ފުޅާކުރުމަށް ކުރާ މަސައްކަތުގެ ބައެއް ކަމަށް މިފްކޯ އިން ބުންޏެވެ.
މިފްކޯގެ މައި ފިހާރައިގައި ރޭ ބޭއްވި ހާއްސަ ރަސްމިއްޔާތުގައި ވަނީ "ރަންވަރު" ބްރޭންޑުގެ ދަށުން ފަސް އުފެއްދުމެއް ބާޒާރަށް ނެރެފަ އެވެ. އެއީ
- ކަންނެލި ސްޓޭކް މަސްދަޅު
- ކަންނެލި ބަނޑައިދޫ މަސްދަޅު
- ރިހާކުރު (މޭ، ބިސް، ލަގޮނޑިއާ އެކު)
- ރިހާކުރު (ހިމުން މުގުރިމަހާ އެކު)
- ތެލުލި ރިހާކުރު (ހިމުން މުގުރިމަހާ އެކު)
މިފްކޯ އިން ބުނި ގޮތުގައި، އެ ހުރިހާ އުފެއްދުމެއް މާލޭގައި ހިންގާ އެ ކުންފުނީގެ ފިހާރަތަކުން މިއަދުން ފެށިގެން ވިއްކާނެ އެވެ.
އެ ކުންފުނިން ނިންމާފައި ވަނީ ކުރިއަށް އޮތް ތަނުގައި އިކޮނޮމީ ޕެކްތަކެއް ވެސް ތައާރަފު ކުރާށެވެ.
މިފްކޯ އިން ބުނީ، ރަންވަރުގެ އުފެއްދުންތަކުގެ ރަހަ ބަލައި، ތަޖުރިބާކުރުމުގެ ފުރުސަތު ކުރިއަށް އޮތް ތިން ދުވަހު އެ ކުންފުނީގެ މަސްފިހާރައިގައި ހަމަޖެހިފައިވާނެ ކަމަށެވެ.
މި އުފެއްދުންތަކާ ގުޅޭގޮތުން މިފްކޯގެ ލޯކަލް ސޭލްސް އެންޑް މާކެޓިން ޖެނެރަލް މެނޭޖަރު ހަސަން ޒާހިދު މުހައްމަދު ވިދާޅުވީ ރަންވަރަކީ ޕްރިމިއަމް ކޮލިޓީގައި ބާޒާރަށް ނެރޭ އުފެއްދުންތަކެއް ކަމަށެވެ. އެގޮތުން މަސްދަޅުގެ ދެ އުފެއްދުމަކާއި ރިހާކުރުގެ ތިން އުފެއްދުމެއް ނެރެފައިވާކަން ޒާހިދު ފާހަގަކުރެއްވި އެވެ.
"މިފްކޯގެ އަމާޒަކީ ރައްޔިތުން ބަލައިގަންނާނެ ފަދަ އުފެއްދުންތަކެއް ބާޒާރަށް ނެރުން. އެގޮތުން ބާޒާރަށް މި ނެރުނު އުފެއްދުންތަކުގެ އިތުރަށް ކުރިއަށް އޮތް ތަނުގައި ވެސް ރަންވަރު ބްރޭންޑުގެ ދަށުން ތަފާތު އުފެއްދުންތައް އަޅުގަނޑުމެން ތައާރަފު ކުރާނަން،" ޒާހިދު ވިދާޅުވި އެވެ.
އޭނާ ވިދާޅުވީ "ރަންވަރު" ބްރޭންޑަކީ ރާއްޖޭގެ ބާޒާރަށް ހާއްސަކޮށް މިފްކޯއިން ތައާރަފުކުރި ބްރޭންޑެއް ކަމަށާއި ބޭރުގެ ބާޒާރަށް ހާއްސަކޮށް ތައްޔާރުކުރާ އުފެއްދުންތަކެކޭ އެއްގޮތަށް، އެ ބްރޭންޑުގެ އުފެއްދުންތަކަށް ވެސް ބޮޑު ތަރުހީބެއް ލިބޭނެ ކަމަށް އުންމީދު ކުރައްވާ ކަމަށެވެ.