އުރީދޫ ނޭޝަނުން ޔޫތު މިނިސްޓްރީއާ ގުޅިގެން ކުރިއަށް ގެންދިޔަ "ރަމަޟާން އީ-ސްޕޯޓްސް ފެސްޓިވަލް" ކާމިޔާބުކަމާއެކު ނިންމާލައިފި އެވެ.
އެ މުބާރާތް ނިންމުމުގެ ގޮތުން ކުލަގަދަ ރަސްމިއްޔާތެއް ޔޫތު ހަބްގައި ވަނީ ބާއްވާފަ އެވެ. ޔޫތު މިނިސްޓަރު އިބްރާހީމް ވަހީދު ޝަރަފުވެރިކޮށްދެއްވި އެ ރަސްމިއްޔާތުގައި އުރީދޫ މޯލްޑިވްސްގެ މެނޭޖިން ޑިރެކްޓަރު އަދި ސީއީއޯ ޝާދީ ގަވާސްމީ އާއި ޗީފް ކޮމާޝަލް އޮފިސަރު ހުސައިން ނިޔާޒު ބައިވެރިވެވަޑައިގަތެވެ.
އުރީދޫ ނޭޝަންގެ އެ ފެސްޓިވަލް ކުރިއަށް ގެންދިޔައީ އޮންލައިންކޮށް އަދި ލޭން ފޯމެޓަށެވެ. އެއީ ރާއްޖޭގެ އެކި ހިސާބުތަކުގައި ތިބި ގޭމަރުންނަށް ވާދަވެރި މާހައުލެއް ފަހިކޮށްދިނުމުގެ ގޮތުން ބޭއްވި ހަރަކާތެކެވެ.
އެކި ގޭމިން މުބާރާތްތައް ކުރިއަށް ގެންދިޔަ އެ ފެސްޓިވަލުގެ ޓެކެން އަދި އީއޭއެފްސީ މުބާރާތްތައް ބޭއްވީ ޔޫތު ހަބްގައި ލޭން އިވެންޓްތަކެއްގެ ގޮތުގަ އެވެ. އަދި ޕަބްޖީ މޮބައިލް އަދި މޮބައިލް ލެޖެންޑްސް: ބޭންގް ބޭންގް (އެމްއެލްބީބީ) ކުރިއަށް ދިޔައީ އޮންލައިންކޮށެވެ.
އެ ފެސްޓިވަލުގައި އީއޭއެފްސީ މުބާރާތުގައި 20 ގޭމަރުން އަދި ޓެކެން މުބާރާތުގައި 16 ގޭމަރުން ވާދަކުރި އެވެ. އަދި ރާއްޖޭގެ އެކި ހިސާބުތަކުން އެ ފެސްޓިވަލުގެ ޕަބްޖީ މޮބައިލް އާއި އެމްއެލްބީބީ މުބާރާތުގައި 38 ޓީމުން ވާދަކުރި އެވެ.
އެ ފެސްޓިވަލުގައި ޕަބްޖީ މޮބައިލް މުބާރާތުން ޑީޖީއެން ސިންޑިކޭޓް އެއް ވަނަ ހޯދިއިރު ދެވަނަ ހޯދީ ގޭމްއޯވާ ރިޖެކްޓް އެވެ. އަދި ތިން ވަނަ ހޯދީ އެލްއެފް އަކަޒާޔާ އެވެ. އެ ފެސްޓިވަލުގައި ކުރިިއަށް ގެންދިޔަދިޔަ މޯބައިލް ލެޖެންޑްސް ބޭންގް ބޭންގްގެ އެއް ވަނަ ހޯދީ އެލްއެންއެން ސްލީޕިން ފޮރެސްޓް އެވެ. އަދި ދެވަނަ ކަޅުއޮށްފުމި ހޯދިއިރު، ތިން ވަނަ ހޯދީ ކުއިސް ވެންގާޑްސް އެވެ.
އެ ފެސްޓިވަލުގައި އީއޭއެފްސީ މުބާރާތުގެ އެއް ވަނަ ހޯދީ އެމްޔޫޖީ ޔާއިޝް އެވެ. އަދި ދެވަނަ އެމްޔޫޖީ ރާއިދު ހޯދިއިރު ތިން ވަނަ ހޯދީ ޒަމީލެވެ. އެ ފެސްޓިވަލުގައި ޓެކެން މުބާރާތުގެ އެއް ވަނަ އެމްޔޫޖީ އަބާން ހޯދިއިރު ދެވަނަ ހޯދީ ކުއިސް އީ-ސްޕޯޓްސް ތާބިޝް އެވެ. އަދި ތިން ވަނަ ހޯދީ އެމްޔޫޖީ އަޝްވާން އެވެ.
އުރީދޫ ނޭޝަނުން ބުނީ ގޭމަރުންގެ ފަރާތުން ހޫނު ތަރުހީބެއް ލިބުނު އެ ފެސްޓިވަލުގައި ރާއްޖޭގައި ގޭމިންއަށް އޮތް ޑިމާންޑާއި ގޭމަަރުންގެ ހުނަރު ފެނިގެން ދިޔަ ކަމަށެވެ. އަދި އުރީދޫ ނޭޝަނުން ޔޫތު މިނިސްޓްރީއާއެކު ގޭމަރުންނަށް އެފަދަ އެކި ފުރުސަތުތައް ފަހިކޮށްދޭން މަސައްކަތް ކުރާނެ ކަމަށް ބުންޏެވެ.