"ސައި ބޯލަން ދީބަލަ 10ރ،" މިއީ ވަރަށް ގިނައިން އިވޭ ވާހަކައެއް. މޫނު ބަލާލާއިރު، އޭނާ އަކީ ހަމަ ރަނގަޅަށް، ސިއްހަތު ސަލާމަތުން ހުރި މީހެކެވެ. ވަރަށް ގިނަ މީހުން ބުނާހެން، ދިވެހިންގެ ހިތްހެޔޮ ކަމުން އޭގެ ފައިދާ ސަލާން ޖަހާ މީހުން ވެސް ނަގަނީ އެވެ. އެކަމުން އެކަށީގެންވާ އާމްދަނީއެއް ލިބޭތީ ޖެހިގެން އަންނަ ދުވަހު ވެސް މަގުމައްޗަށް ނުކުންނަނީ އެވެ.
ވަރަށް ގިނަ މީހުން ގަބޫލުކުރާ ގޮތުގައި މާލޭގެ މަގުތަކުގައި ސަލާން ޖަހާ ވަރަށް ގިނަ މީހުންނަކީ "ފޭކު" މީހުންނެވެ. އެ މީހުންގެ ވަރަށް ގިނަ ތަފާތު "ސްޓޯރީތައް" ހުރެ އެވެ. މިއަދު އެއް ވާހަކައެއް ދައްކައިފިއްޔާ ޖެހިގެން އަންނަ ދުވަހު ދައްކާނީ އެހެން ވާހަކަ އެކެވެ. މިއީ ވެސް އޭގެ ތެރެއިން އެކަކެވެ. އެ ބުނާ ބޭހެއް ކުރަން ދުވަހަކު ވެސް ފައިސާ ހަމައެއް ނުވި އެވެ.
މާލޭގައި ސަލާން ޖަހަނީ ވަކި ޒުވާނުން އެކަންޏެއް ނޫނެވެ. އުމުރުން ދުވަސްވީ މީހުންް ވެސް އެކަމުގައި ހަރަކާތްތެރިވެ އެވެ. އާންމުން ތުހުމަތުކުރާ ގޮތުގައި އޭގެ ތެރެއިން ހަމަ ވަރަށް ގިނަ އަދަދެއްގެ މީހުންނަކީ ޑްރަގްސް ގަންނަން ފައިސާ ހޯދުމުގެ ބޭނުމުގައި ސަލާން ޖަހާ މީހުންނެވެ. އޭގެ ބައެއް ހަގީގަތްތައް ވެސް އެބަހުއްޓެވެ. ސަލާން ޖަހަން ނުކުންނަ އިރު ވެސް ބައެއް މީހުން ތިބެނީ "ވެއްޓިފަ" އެވެ. ދިއްކޮށްގެން އިންނަ އަތަށް ލާރިކޮޅު ދޭ އިރު ވެސް އޭނާ އަކަށް ނޭނގެ އެވެ.
ޒުވާނުންގެ ބޮޑު އާބާދީއެއް ސަލާން ޖަހާތަން މީގެ ކުރިން ނުފެނުމަކީ އެކަށީގެންވާ ކަމެކެވެ. މި ޒުވާނާ އަކީ ވެސް "ހަމަ އެންމެ ބޭނުމެއްގައި ސަލާން ޖަހާ މީހެކެވެ". ކޮންމެ ދުވަހަކު ވެސް ތަފާތު ވާހަކައެކެވެ. އެކަމަކު، އެ ވާހަކަ އަށް ހަމްދަރުދީވެ، ހެޔޮ ނިޔަތެއްގައި އާންމުން ދޭ ފައިސާކޮޅު އޭނާ ގޮސް ހުސްކޮށްލަނީ އެހެން ބޭނުމެއްގަ އެވެ. އާންމުންނަށް ގިނަ ފަހަރު އޮންނަނީ ވާނުވަ ނޭނގިފަ އެވެ. ހަގީގަތް ގަބޫލުކުރަމާ ހިނގާށެވެ! ރައްކާތެރިވާށެވެ! މިގޮތަށް ތިބޭ ގިނަ މީހުންނަަށް ފައިސާ ދިނުމަށް ވުރެ ނުދިނުން ރަނގަޅެވެ.
މާލެ ތެރޭގައި ސަލާން ޖަހަން އުޅޭ ބައެއް ޒުވާނުންގެ ތެރެއިން އެއް ބަޔަކީ، ދާދިފަހުން މަސްތުވާތަކެތީގެ ކެފޭތައް ބަންދުކުރުމުން އެތަންތަނަށް ވަދެވޭނެ ގޮތް ނުވެގެން މަގުމައްޗަށް ގިނަވި ބައެއް ކަމަށް ވެ އެވެ. އޭގެ ތެރެއިން ބައެއް މީހުން ކާނެ، ބޯނެ ގޮތެއް ވެސް ނެތެވެ. "ފައިސާ ނެތިއްޔާ ކާނެ އެއްޗެއް ވިޔަސް ދޭށޭ" ބުނަނީ އެހެންވެ އެވެ.
ސިއްހަތު ސަލާމަތުން ތިބި އެތައް ބަޔަކު މަގުމަތިވެފައިވާ މައްސަލަ އަކީ ރާއްޖޭގައި ވަރަށް ބޮޑުވެފައިވާ މައްސަލަ އެކެވެ. ހާއްސަކޮށް ޖަލުތައް ފުރިގެން، ކުދިކުދި ކުށްތަކުގައި ޖަލުގައި ތިބި މީހުން ދޫކޮށްލަން ފެށުމާ އެކު އޭގެ އުނދަގޫ ފޯރަނީ އާންމުންނަށެވެ. އޭގެ ތެރެއިން ގިނަ މީހުން ޖަލުން ނުކުންނަ އިރު ވެސް ތިބެނީ މުޖުތަމައަށް ނުކުމެވޭ ވަރުގެ ހާލަތެއްގައެއް ނޫނެވެ. އަޅާލާނެ ބަޔަކު ނެތެވެ. އެ މީހުން ބުނާގޮތުގައި ދެން އޮތީ މަގުމައްޗެވެ.
ގިނަ މީހުންގެ ވިސްނުން ބަދަލުވެއްޖެ އެވެ. އެހީ އަށް ދިއްކޮށްލާ އަތާ ދޭތެރޭ އެތައް ބަޔަކު މިހާރު ވަނީ ސުވާލު އުފެދިފަ އެވެ. އެއީ ހަމަ ހަގީގަތުގައި ވެސް އެހީ ބޭނުންވާ މީހެއްތޯ، އާންމުންގެ ތެރެއިން އެތައް ބަޔަކު މިހާރު ޝައްކު އުފައްދަ އެވެ. ބޭސް ސިޓީ ދެއްކިޔަސް، ބޭސް ލިބޭނެކަން މިހާރު ކަށަވަރެވެ. ސައިބޯން ލާރިއެއް ދޭށޭ ބުނާއިރަށް، ސައިބޯން ހިނގާށޭ ބުނެ އެވެ. އެހެންވެ ސަލާން ޖަހާ މީހުން ވެސް މިހާރު ވަނީ އެހެން އުކުޅުތައް ބޭނުން ކުރަން ފަށައިފަ އެވެ.